Një ditë pas vdekjes së aktorit të madh Adem Mikullovci, ka ardhur edhe propozimi që Teatri i Qytetetit të Vushtrrisë, të mbajë emrin e këtij aktori.
E ky propozim ka ardhur nga Qendra e Lëvizjes Vetëvendosje në Vushtrri, pjesë e së cilës lëvizje ishte Mikullovci, me të cilën kishte fituar edhe mandatin e deputetit.
Këtë e ka konfirmuar për Telegrami Sot, drejtoresha e Drejtorisë për Kulturë, Rini dhe Sport në Vushtrri, fatmire Cecelia.
“Lëvizja VETËVENDOSJE! Qendra Vushtrri, nëpërmjet Grupit Kuvendar të saj, ka dorëzuar në Sekretarinë e Kuvendit Komunal Vushtrri, kërkesën për futje në rend të ditës në seancën e radhës, propozimin për ndryshimin e emërtimit të Teatrit të Qytetit – Vushtrri, në Teatri “Adem Mikullovci” – Vushtrri”, ka thënë Cecelia e cila ka shtuar se arsyetimin e bazojmë në kontributin e jashtëzakonshëm të tani të ndjerit Adem Mikullovci, në veprimtarinë e tij artistike, kulturore dhe politike përgjatë jetës së tij, e poashtu duke e ditur edhe prejardhjen e tij nga qyteti ynë.
“Mbesim me shpresë që propozimi ynë të gjej mbështetje të gjerë edhe nga Grupet Kuvendare të subjekteve të tjera politike në Kuvendin Komunal Vushtrri”, ka thënë në fund drejtoresha e DKRS-së, Fatmire Cecelia. /Telegrami Sot/
