Ish-ministri i jashtëm Enver Hoxhaj, përmes një opinioni të publikuar në gazetën prestigjoze austriake “Der Standard”, ka shkruar për ngjarjet e fundit në Bjellorusi, për të cilat ka thënë se janë gjithashtu një provë për Ballkanin nëse regjimet e tilla autoritare do t’i përkasin së kaluarës apo do të jenë e ardhmja në Evropën Lindore dhe Juglindore.
Hoxhaj, ka dhënë disa mendime rreth gjendjes në Bjellorusi dhe për ndikimin e tyre në Ballkan e më gjerë.
“Shumë popuj në Ballkan e kanë përjetuar tashmë dramën Bjelloruse kur vepruan kundër diktatorëve të ngjashëm. Por Lukashenko nuk duket se është i vetmi në Evropë me sjellje autoritare. Ngjarjet e Bjellorusisë janë gjithashtu një provë për Ballkanin nëse regjimet e tilla janë një gjë e së kaluarës apo nëse ato madje do të jenë e ardhmja në Evropën Lindore dhe Juglindore.”, ka shkruar Hoxhaj.
Ai ka thënë se metodat e Lukashenkos, siç është arrestimi i anëtarëve të opozitës, gazetarëve dhe aktivistëve ose markës së tyre si “kolonë e pestë”, janë të ngjashme me ato të Presidentit serb Aleksandër Vuçiq.
Në opinionin e titulluar: “Bjellorusia: Një provë për botën demokratike”, Hoxhaj thotë se rezultati i zgjedhjeve në Bjellorusi ishte i lehtë për t’u parashikuar.
Sipas tij, ishte e qartë se autoritetet elektorale të kontrolluara Bjelloruse do ta shpallnin Aleksandër Lukashenko fitues.
“Pasiguria e vetme ishte nëse ai dëshironte të kapërcejë mentorin e tij Vladimir Putin me rezultatin e zgjedhjeve!”, ka shkruar tutje Hoxhaj.
Në formë të ngjashme, Hoxhaj thotë se edhe Vuçiq arriti t’i merrte 60 për qind të votave në zgjedhje.
“Bojkoti i opozitës serbe nuk ishte asgjë për t’u shqetësuar. Si Lukashenko për Bashkimin Sovjetik, Vuçiq ende tregon nostalgji për Slobodan Milošević dhe Jugosllavi. Një arsye më shumë që Brukseli të mbrojë demokracinë në tokën evropiane!”, ka thënë ai.
Nënkryetari i PDK-së, Enver Hoxhaj, gjithashtu shkroi se sa më shumë njerëz në Bjellorusi të dalin në rrugë, aq më shumë udhëheqës autoritarë nga e gjithë bota qëndrojnë prapa Lukashenko.
“Ata i ofrojnë mbështetje dhe duan t’u tregojnë qytetarëve të tyre se nuk do të heqin dorë nga pushteti i tyre pa dhunë. Bjellorusia tani është futur në një betejë tipike të kohës sonë midis demokracisë dhe autoritarizmit – si e tillë ajo perceptohet në Ballkan.”, ka shkruar ai.
