Tetëdhjetë e dy imigrantë kanë zbarkuar në ishullin jugor italian të Lampedusa-s pas gjashtë ditëve të qëndrimit në det.
Italia thotë se e ka lejuar zbarkimin e anijes “Ocean Viking” në portin e saj për shkak se shumica e imigrantëve që ndodhen në të do të dërgohen në shtete të tjera të Bashkimit Evropian.
Ky vendim paraqet ndryshim të politikës italiane ndaj imigrantëve nga koalicioni i ri qeveritar, i cili erdhi në pushtet të martën e kaluar.
Ish-ministri i jashtëm italian, Matteo Salvini, vazhdimisht i bllokonte anijet e organizatave bamirëse dhe nuk i lejonte të zbarkonin në portet e Italisë.
Ministri i jashtëm italian, Luigi Di Maio, tha për një televizion se anija u lejua të zbarkojë në port pasi Bashkimi Evropian e ka pranuar kërkesën e Italisë për ta marrë shumicën e imigrantëve të kësaj anije.
“Duhet ta bëjmë të qartë se qëllimi ynë edhe në qeverinë e kaluar ka qenë që të sigurohemi që ata imigrantë që arrijnë në Itali të dërgohen në shtetet tjera evropiane”, tha ai.
Ndryshe, ministri i brendshëm francez, Christophe Castaner, njoftoi të shtunën përmes internetit se Italia, Franca, Gjermania, Portugalia dhe Luksemburgu e kanë arritur një marrëveshje për pranimin e këtyre imigrantëve, shkruan “BBC”
