Në kuadër të investimeve kapitale, Kryetari i Komunës së Obiliqit Xhafer Gashi, së bashku me Nënkryetarin,Kryesuesin, asambleistët, ekzekutivin, drejtorin e shkollës, mësimdhënësit, bënë vënien e gurthemelit për fillimin e dy projekteve.
Projektet në fjalë janë ndërtimi i sallës sportive dhe aneksit të shkollës fillore “Pandeli Sotiri“ në Obiliqin e vjetër dhe ndërtimin e aneksit të shkollës “Naim Frashëri“ në fshatin Breznicë, njofton Klan Kosova.
Vlera e projektit të parë është: 247,535.08€, ndërsa i të dytit: 76,337.98€, me plan dinamik 120 ditë pune.
“Vënia e këtyre dy gurthemeleve, tregon përkushtimin dhe angazhimin tonë të pandalshëm në rritjen e cilësisë në arsim, mbarëvajtjen e procesit mësimor në një ndërrim dhe zhvillimin e aktiviteteve sportive nëpër sallat sportive të shkollave, duke kontribuar kështu në zhvillimin e shëndetit mendor dhe atij fizik” ka thënë kryetari Gashi.
