Skuadra e Dritës ka arritur në Aeroportin Ndërkombëtar të Prishtinës “Adem Jashari” për tu nisur për në Nyon të Zvicrës, atje ku do të luajë edhe ndeshjet parakualifikuese për në Ligën e Kampionëve.
Atmosfera në skuadrën nga Gjilani ishte në nivelin më të lartë, përderisa lojtarët u shprehen se kërkojnë suksesin më të madh në histori të klubit.
Mirëpo, drejtori sportiv i klubit, Valon Zymberi, kishte disa ankesa për ambasadën zvicerane dhe shtetin e Kosovës, të cilët sipas tij, nuk janë kujdesur sa duhet për skuadrën e tij.
“Kemi pasur disa probleme. Vetëm pak minuta para se të mbërrijmë këtu i kemi marrë pasaportat. Ka qenë një neglizhencë e paparë nga ambasada zvicerane dhe nuk është hera e parë që ndodh kjo”, tha ai.
Trajneri i skuadrës nga Gjilani u shpreh se këto probleme nuk kanë ndikuar dhe se skuadra është e etur për të arritur suksese në këtë aventurë.
“Këto probleme nuk kanë ndikuar aspak te lojtarët, ata janë të fokusuar vetëm në futboll dhe janë shumë të etur për të arritur suksese atje”, shtoi ai.
Ndërsa, kapiteni i skuadrës, Ardi Limani, u shpreh se skuadra e tij është e përgatitur maksimalisht dhe shpreson që se paku të kalojnë turneun parakualifikues.
Drita të shtunën, me fillim nga ora 18:00, e luan ndeshjen e parë parakaulifikuese ndaj kampionit të Andorës, Inter Escaldes.
Fituesi i ndeshjes do të kualifikohet në finale të këtij turneu preliminar, ku do të ndeshet me njërin nga ekipet, Tre Fiori ose Linfieldi.
