Më 22 shkurt në emisionin Opinion me Blendi Fevziuni, tashmë kryeministri Albin Kurti, pati dhënë një deklaratë të fuqishme, kundër hyrjes së mallrave të Serbisë në Kosovë.
Ai pati deklaruar se përderisa Serbia nuk ta njeh pasaportën dhe të detyron t’i ndërrosh targat e veturës për të kaluar kufirin, atëherë nuk e meriton ta ketë tregun e Kosovës.
“Serbia duhet të kushtëzohet, gjithkund në botë kushtëzojnë shtete njëra-tjetrën, atëherë kur shtetet e caktuara nuk i lajnë borxhet. E bllokon kufirin dhe thotë nuk ta lejoje tregun e Kosovës përderisa sillesh në mënyrë kriminale ndaj meje”, pati thënë Kurti.
Ndërkohë, plotë tetë vite pas, kryeministri Albin Kurti, kërkon që të hiqet taksa 100% e vendosur nga ish-qeveria Haradinaj ndaj produkteve Serbe. Kurti, thotë se këtë do ta zëvendësojë me reciprocitet.
“E kemi përsëritur dhe theksuar qëndrimin tonë, se tarifën 100 për qind ndaj mallrave të Serbisë ne do ta zëvendësojmë me parimin e reciprocitetit. Pra, nuk është se do ta heqim tarifën dhe nuk do ta vëmë reciprocitetin, por do ta vëmë reciprocitetin dhe do ta heqim tarifën”, ka thënë para tri ditësh kryeministri Kurti në një intervistë për REL.
