Kanë kaluar më shumë se dy orë qe kur i pari i Lëvizjes Vetëvendosje, Albin Kurti dhe ai i Lidhjes Demokratike të Kosovës, Isa Mustafa, janë “ngujuar” në hapësirat e Kuvendit të Kosovës për të arritur një marrëveshje për bashkëqeverisje.
Të dyja partitë fituese nga zgjedhjet e 6 tetorit kanë arritur t’i harmonizojnë programet për bashkëqeverisje, por ndarja e ministrive dhe në veçanti posti i presidentit është bërë shkak që këto dy subjekte të kenë mospajtime, shkruan Klan Kosova.
Kujtojmë se më 02 dhjetor, Mustafa dhe Kurti u takuan për të njëjtin qëllim – arritjen e marrëveshjes për bashkëqeverisje. Pas këtij takimi, Kurti tha se “avancim ka, por jo marrëveshje”. Ndërsa Mustafa ka thënë se dallimet mes tyre do t’i zbulojnë pasi t’i përafrojnë ato.
Tani si duket të dy ata u janë qasur më seriozisht bisedimeve për t’i tejkaluar dallimet mes tyre dhe mbetet të shihet nëse do ta arrijnë këtë gjë pas një takimi prej tre orësh.
