Prokurori Bekim Kodraliu gjatë dhënies së fjalës hyrëse në gjykimin ndaj të akuzuarve për sulmin në kanalin e Ibër-Lepencit në Varagë të Zubin-Potokut, tha se ekspertët e FBI-së kanë analizuar dheun në çizmet e të akuzuarve me atë në vendin e ngjarjes.
“Ekspertët e FBI-së kanë analizuar mostrat e baltës dhe të dheut të mara nga çizmet e dy të pandehurve Jovan dhe Dragisha Viqentijeviq, dhe ato mostra i kanë krahasuar edhe me mostrat e dheut të siguruara në vendin e ngjarjes e po ashtu edhe në tri vende të tjera të ndryshme me qëllim që të vërtetohet saktësia e baltës së gjetur në çizmet e të pandehurve”, tha Kodraliu.
Sipas prokurorit, konkluzionet e ekspertëve tregojnë se mostrat e dheut në çizmet e dy të akuzuarve ishin me karakteristika të njëjta me ato të dheut në vendin e ngjarjes, raporton “Betimi për Drejtësi“.
“Konkluzioni i ekspertëve të FBI-së se mostrat e çizmeve të të pandehurve për dallim me tri vendet e tjera, nuk paraqesin dallime për nga ngjyra, struktura, përbërja minerale dhe karaktersitikat tjera fizike të dheut të marrë në vendin e ngjarjes me dheun e gjetur në çizmet e të pandehurve Jovan dhe Dragisha Viqentijeviq, por ka dallueshmëri me mostrat e dheut të marra në tri lokacione të tjera, e që do të vërtetohet para jush se të pandehurit kanë qenë pjesëmarrës të drejtpërdrejtë në sulmin terrorist në kanalin e Ibër-Lepencit”, shtoi ai.
Prokurori tha se Qeveria e Serbisë kishte rol kyç në përgatitjet e këtij sulmi.
“Do të paraqesim prova konkrete lidhur me trajnimet dhe përgatitjet konkrete që sipas provave janë zhvilluar në poligonin ushtarak, i quajtur “Livadhet e pasulit” në Republikën e Serbisë që tashmë dyshohet se ka edhe varrezë masive, krejt kjo si pjesë e përgatitjeve të aktiviteteve të kundërligjshme ndaj shtetit të Republikës së Kosovës”, tha Kodraliu, raporton “Betimi për Drejtësi“.
Prokurori tha se nga provat që kanë siguruar, e që do të prezantohen gjatë këtij gjymimi dhe provat e rasteve të mëhershme, do të vërtetohet se Qeveria e Serbisë ka pasur një rol kyç në këto përgatitje.
