Këshilli Prokurorial i Kosovës (KPK) ka votuar sot për shkarkimin e Besim Kelmendit nga pozita e ushtruesit të detyrës së Kryeprokurorit të Shtetit, vendim i cili u miratua me pesë vota për.
Ky zhvillim konfirmon raportimin e mëhershëm të gazetës TelegramiSot, i cili doli të jetë i saktë.
Në vend të Kelmendit, KPK ka caktuar Agron Qalajn si ushtrues detyre të Kryeprokurorit të Shtetit.
Tension dhe largim nga mbledhja: “Po dëshironi të shkatërroni sistemin”
(Orë e përditësuar 10:56) – Para votimit për shkarkim, situata në mbledhjen e Këshillit Prokurorial u tensionua.
Gjatë diskutimit për futjen e pikës në rend dite, Besim Kelmendi dhe katër anëtarë të KPK-së lanë mbledhjen, duke akuzuar se po tentohet “shkatërrimi i sistemit prokurorial”.
Anëtari Veton Shabani deklaroi se ekziston një agjendë për dëmtimin e sistemit prokurorial, por sipas tij “kjo tentativë është e kotë”.
“Ka vetëm një adresë dhe një agjendë për dëmtimin e sistemit prokurorial, por kjo tentativë është e kotë.
Nuk do jem pjesë e agjendave të ulëta”, tha Shabani.
Ndërsa Arian Gashi e quajti propozimin për futjen në rend dite të shkarkimit “të papranueshëm dhe të paprecedent”, duke e cilësuar si “keqpërdorim të pozitës zyrtare”.
Ai shtoi se Këshilli me këtë veprim “ka humbur legjitimitetin”.
Në replikë, kryesuesi Hajdaraj tha se “po shihet kush është për të shkatërruar sistemin”.
Largimi nga mbledhja
Fillimisht sallën e lanë Arian Gashi dhe Visar Krasniqi, e më pas edhe vetë Besim Kelmendi bashkë me Dardan Vuniqin.
Vuniqi deklaroi se integriteti i tij nuk bie nën presion dhe se mbledhjen po e lë për të “ruajtur rendin juridik”.
“Mua më duhet ta lëshoj këtë takim pasi ky konflikt është filluar pa qenë unë këtu. Në momentin që bindem, do të rikthehem”, tha Vuniqi.
Ndërkohë, Shabani propozoi që Këshilli të mos thërrasë më asnjë takim derisa situata të qartësohet.
Pas largimeve dhe debatit të ashpër, kryesuesi Hajdaraj ndërpreu mbledhjen dhe caktoi pauzë.TelegramiSot
