Një rast tronditës dhune në familje është raportuar në fshatin Kovragë të Istogut, ku viktimë ka qenë një vajzë e mitur, vetëm 13-vjeçare.
Sipas burimeve të besueshme nga strukturat e afërta me hetimin, ngjarja ka ndodhur më 07 nëntor 2025, rreth orës 17:00, kur e mitura E. F. ka raportuar se është rrahur nga nëna e saj, R. F. dhe nga vëllai i saj, M. F..
Sipas dëshmisë së vajzës, dhuna ka ndodhur pasi ajo ishte kthyer me vonesë në shtëpi, ndërsa si pasojë ka pësuar lëndime trupore për të cilat ka marrë tretman mjekësor.
Në deklarimet e dhëna para policisë: Nëna e saj, R. F, ka pranuar se e ka goditur vajzën me kabllo të adapterit të telefonit, duke shprehur pendesë për veprimin.
Vëllai i saj, M. F., po ashtu ka pranuar se e ka rrahur motrën për të njëjtën arsye, në prani të avokatit mbrojtës dhe punëtores për punë sociale.
Të dy të dyshuarit janë intervistuar në prani të mbrojtjes ligjore, ndërsa me urdhër të prokurorëve përkatës rasti është inicuar si “Dhunë në familje – Lëndim i lehtë trupor”.
Pas procedurave, të dyshuarit janë liruar në procedurë të rregullt, ndërsa viktima, me dëshirën e saj, është kthyer në shtëpi me familjarët.
