Presidenti sirian Ahmed Sharaa ka mbërritur në Uashington për një vizitë zyrtare, vetëm dy ditë pasi SHBA-të ia hoqën zyrtarisht sanksionet ndaj tij.
Ish-militanti islamist do të takohet me Presidentin e SHBA-së, Donald Trump në Shtëpinë e Bardhë të hënën, njëmbëdhjetë muaj pasi aleanca e tij rebele rrëzoi Bashar al-Assad.
Orë para mbërritjes së tij në kryeqytetin e SHBA-së, u njoftua se shërbimet siriane të sigurisë kishin arrestuar dhjetëra anëtarë të dyshuar të të ashtuquajturit grup Shtet Islamik.
Përpjekjet e përbashkëta për të luftuar atë që ka mbetur nga grupi në Siri pritet të jenë në krye të agjendës gjatë bisedimeve të Sharaas me Trump.
Autoritetet siriane thanë se 71 anëtarë të dyshuar të grupit u arrestuan, si dhe u sekuestruan armë dhe eksplozivë.
Që nga marrja e pushtetit, Sharaa është përpjekur të rivendosë praninë e Sirisë në skenën botërore pas dekadash izolimi nën regjimin e Asadit dhe 13 vitesh luftë civile.
Ai udhëtoi për në SHBA në shtator për t’iu drejtuar Asamblesë së Përgjithshme të OKB-së, ku tha se Siria po “rimerrte vendin e saj të merituar midis kombeve të botës” dhe i bëri thirrje bashkësisë ndërkombëtare të hiqte sanksionet.
Më parë këtë javë, Këshilli i Sigurimit i OKB-së mbështeti një rezolutë të SHBA-së për të hequr masat, gjë që përkoi me vazhdimin e një procesi disamujor të lehtësimit gradual të sanksioneve ndaj Sirisë dhe udhëheqësve të saj të rinj nga Uashingtoni.
