Qeveria në detyrë e Kosovës ka rritur shpenzimet për 105 milionë euro krahasuar me të njëjtën periudhë të vitit të kaluar.
E nisi dhe e sosi si qeveri në detyrë.
Por ani se në tremujorin e dytë të këtij viti, pati veç mandat kujdestar ekzekutivi i drejtuar nga Albin Kurti i rriti shpenzimet në krahasim me periudhën e njëjtë të 2024-s.
Të dhënat e publikuara nga Agjencia e Statistikave tregojnë se gati 785 milionë euro u harxhuan për prill, maj e qershor, e që janë afro 106 më shumë se vjet.
Një kësi bilanci, është i papritur për monitoruesit e qeverisë.
Kompensimi i punëtorëve me 28% përbën kategorinë më të lartë të shpenzimeve, e planifikimi për monitoruesit e ekzekutivit duhet të jetë më profesional.
Por për të hartuar një strategji të mirëfilltë, dikush vlerëson se pati mungesë të resurseve humane.
Për njohësin e ekonomisë, Shkëlzen Dakaj, është absurd se ky keqmenaxhim bëhet nga qeveria, që ka ardhur në pushtet me premtimin për ruajtjen e parasë publike.
Pjesë e këtyre mjeteve janë edhe kontributet sociale, formimi i kapitalit bruto e konsumi ndërmjetëm.
Agjencia e Statistikave të Kosovës (ASK) ka bërë të ditur se qeveria, në tremujorin e dytë të vitit 2025, ka shpenzuar afër 785 milionë euro, që është rreth 105 milionë euro më shumë sesa në të njëjtën periudhë të vitit 2024.
Në publikimin e llogaritjes qeveritare për tremujorin e dytë, ASK-ja njofton se “gjithsej shpenzimet e Qeverisë së Përgjithshme në TM2 2025 ishin 784.9 milionë euro, ndërsa shpenzimet në TM2 2024 ishin 679.1 milionë euro”.
ASK-ja ka sqaruar se pjesën më të madhe të shpenzimeve e përbëjnë kompensimi i punëtorëve (28%), kontributet sociale dhe përfitimet (26%), formimi i kapitalit bruto (15%) dhe konsumi i ndërmjetëm (14%). Pjesa e mbetur e shpenzimeve është shpërndarë në kategori të tjera.
“Pjesën më të madhe të të hyrave e përbëjnë: tatimet mbi produktet (64%), tatimet rrjedhëse mbi të ardhurat (16%) dhe aktivet e detyrimet financiare (10%). Pjesa e mbetur është shpërndarë në kategori të tjera të të hyrave”, thuhet në komunikatën e ASK-së.
Sipas të dhënave nga ASK-ja, shpenzimet e Qeverisë së Kosovës në tremujorin e parë të vitit 2025 (TM1 2025) arritën në 703.2 milionë euro, duke shënuar një rritje prej rreth 17% krahasuar me të njëjtën periudhë të vitit të kaluar, kur shpenzimet ishin 601.6 milionë euro.
Në të njëjtën periudhë, të hyrat e përgjithshme të Qeverisë arritën në 687.9 milionë euro, duke shënuar një rritje modeste prej rreth 1.2% krahasuar me 679.7 milionë euro në TM1 2024.
Këto të dhëna treguan për një rritje të shpenzimeve qeveritare, ndërkohë që të hyrat kanë pasur një rritje më të ngadaltë, duke reflektuar një rritje të deficitit buxhetor në këtë periudhë.
