Një oficer policie i qytetit të Nju Jorkut është midis katër personave të vrarë në të shtëna me armë që ndodhën dje pasdite në një rrokaqiell në qendër të Manhattanit.
Sipas policisë, sulmuesi Shane Devon Tamura (27) udhëtoi nga Las Vegasi në New York dhe motivi i tij për sulmin është ende i panjohur. Pas të shtënave, ai u gjet i vdekur me atë që autoritetet e quajnë “plagët e vetëshkaktuara me armë zjarri”. Një sasi shtesë municioni u gjet në makinën e tij.
Tamura parkoi BMW-në e tij përpara ndërtesës dhe hyri në ndërtesën e zyrave me një pushkë M4 në dorë. Sapo hyri në holl, ai hapi zjarr ndaj një oficeri të sigurisë në ndërtesë. Ai qëlloi gjithashtu një grua që u përpoq të fshihej pas një shtylle”, tha Komisionerja e Policisë, Jessica Tisch.
Pastaj ai hyri në ashensor, u ngjit në katin ku ndodheshin zyrat e administratës së ndërtesës dhe vazhdoi të qëllonte në korridor përpara se t’i jepte fund jetës.
Midis të vrarëve ishte oficeri 36-vjeçar i policisë Didarul Islam, një emigrant nga Bangladeshi i cili kishte punuar për Policinë e New Yorkut për tre vjet. Ai ishte baba i dy fëmijëve dhe gruaja e tij ishte shtatzënë me fëmijën e tyre të tretë.
“Ai bëri punën që i kërkuam. Ai dha jetën për të mbrojtur të tjerët. Ai vdiq ashtu siç jetoi – një hero”, tha Komisioneri Tisch. Policia postoi foton e tij në mediat sociale me mesazhin: “Ai ishte mishërimi i asaj që përfaqëson shërbimi ynë. Ne do ta çmojmë kujtimin e tij përgjithmonë.”
Kryebashkiaku Eric Adams konfirmoi se gjithsej gjashtë persona u plagosën gjatë sulmit dhe katër humbën jetën. “Nuk ka fjalë për të përshkruar këtë të keqe. Ne lutemi për të gjithë ata që janë prekur nga ky akt i tmerrshëm”, tha Adams.
Personi i armatosur, sipas autoriteteve të Las Vegasit, kishte një “histori të dokumentuar të problemeve të shëndetit mendor”. Hetuesit ende po përpiqen të përcaktojnë pse ai udhëtoi nëpër disa shtete – përmes Kolorados, Nebraskës, Ajovës dhe Nju Xhersit – për të shkuar në Nju Jork dhe pse zgjodhi pikërisht këtë ndërtesë.
Ndërtesa ku ndodhi të shtënat është shtëpia e dhjetëra kompanive, përfshirë NFL-në, grupin e investimeve Blackstone, Ruden Real Estate dhe firmën e kontabilitetit KPMG US.
