Në ditën kur nisi lufta Izrael-Iran, çmimi mesatar i importit për litër nafte ishte 49 centë, pa taksa, apo rreth 99 centë me taksa. Ndërsa, të shtunën e kaluar, çmimi mesatar i importit për një litër naftë ishte 57 centë – pa taksa, ndërsa me taksa 1 euro e 9 centë. E në treg, është duke u shitur rreth 1 euro e 32 centë. Gjatë ditës, ka reaguar ministria e Industrisë, që vendosi të aktivizojë çmimet tavan për 90 ditë.
Deri në 1 euro e 32 centë kushton një litër naftë në pikat e shitjes me pakicë.
Ka të tjera që litrin e naftës e shesin 1 euro e 27 centë.
Ndërkaq, për naftë të performancës më të lartë litri shkon deri në 1 euro e 37 centë.
Por, bazuar në të dhënat që Doganës, më 21 Qershor çmimi mesatar i importit për një litër naftë pa taksa ishte 57 centë.
Ndërsa, kur në llogaritje hyjnë taksa doganore prej 10%, TVSH-ja 18% dhe akciza që është fikse, 36 centë për litër nafte, çmimi final i importit del se ishte rreth 1 euro e 9 centë për litër.
Marrë për referencë çmimin 1 euro e 32 centë, dallimi me atë të importit del të jetë rreth 23 centë për litër.
Madje, ditën kur nisën sulmet e Izraelit ndaj Iranit, më 13 Qershor, sipas llogaritjeve bazuar në të dhënat e Doganës, një litër naftë hyri në Kosovë për 49 centë, pa taksa.
Me taksa, çmimi final i importit del se ishte rreth 99 centë për litër.
Në të dhënat e Doganës vërehet se çmimi i naftës së importuar nga Arabia Saudite, edhe më 21 Qershor, sillej në rreth 50 centë për litër pa taksa.
Ndërsa e asaj nga Greqia sillej rreth 60 centë për litër.
Ministria e Industrisë, Ndërmarrësisë dhe Tregtisë e as Inspektorati i Tregut në kuadër të saj, nuk u përgjigjën nëse kanë kryer inspektime lidhur me këto dallime.
Sidoqoftë, pasditen e së martës, kjo ministri vendosi të aktivizojë çmimet tavan për 90 ditë.
“Me këtë vendim është përcaktuar marzha tregtare maksimale e lejuar si në vijim: Shitja me shumicë: deri në 2 eurocent për litër; Shitja me pakicë: deri në 12 eurocent për litër”.
Referuar situatës, ish-ministri i Tregtisë, Ismet Mulaj, theksoi se kompanitë po e shfrytëzojnë dobësitë e institucioneve.
“Rritja e shpejtë e çmimeve të naftës, për shkak të të ashtuquajturës rritje në bursat ndërkombëtare, dhe mos zbritja në rast se këto çmime, ky produkt, zbritet në bursat ndërkombëtare, tregon që tregu i Kosovës nuk është treg i ndërgjegjshëm, nuk është treg i drejtë, nuk është treg i rregulluar si duhet dhe institucionet nuk ndërmarrin veprimet e duhura”, ka thënë Mulaj.
Krahas nevojës që operatorët privatë të ndërtojnë besim te qytetarët, me çmime, cilësi e sasi, Mulaj përmendi pasojat e mos-veprimit të Autoritetit të Konkurrencës dhe Inspektoratit të Tregut.
“Mund të mos ketë marrëveshje të drejtpërdrejtë dhe juridike ndërmjet operatorëve të mëdhenj në treg, por realisht po t’i shohim me sy të vëmendshëm shihet që pak a shumë që të gjithë tregtarët e mëdhenj i kanë çmimet njësoj dhe në mënyrë automatike edhe i rrisin çmimet ose i zbresin çmimet sikur të kishte marrëveshje”, ka shtuar Mulaj.
Menjëherë pas njoftimit të presidentit amerikan, Donald Trump, për armëpushim ndërmjet Izraelit dhe Iranit, çmimet e naftës në bursat ndërkombëtare shënuan ulje të ndjeshme./RTV Dukagjini
