Ilir Meta, kryetari i Partisë së Lirisë dhe ish-presidenti i Republikës, i cili ndodhet në burg që prej tetorit me akuzën e korrupsionit, ka nisur zyrtarisht fushatën elektorale për zgjedhjet e ardhshme nga qelia.
Me një mesazh të drejtpërdrejtë gjatë prezantimit të kandidatëve të PL-së, Meta u bëri apel mbështetësve të tij të angazhohen fuqishëm në këto 35 ditë që kanë mbetur deri në zgjedhje.
“Çdo ditë shkruaj dhe dërgoj 50 deri në 100 letra për miqtë e mi të hershëm – që nga shkolla fillore ‘Kongresi i Lushnjës’, te ‘Fan Noli’, gjimnazi ‘Sami Frashëri’ dhe Fakulteti i Ekonomisë – për të kërkuar mbështetjen e tyre. Jo vetëm për listën Nr. 1, PD–ASHM, por edhe për Ilir Metaj si deputet i Tiranës,” shkruan Meta në një deklaratë të shpërndarë nga zyra e tij.
Edhe pse në kushte izolimi, Meta nuk heq dorë nga beteja politike. Përmes letrave personale, ai po përpiqet të ndërtojë një fushatë ndryshe, ku komunikimi direkt me qytetarët mbetet thelbësor.
“Nuk isha unë si President ai që shkova vetë në Gjykatën Kushtetuese për të ndaluar shkatërrimin barbar të Teatrit Kombëtar? A nuk ishte diktatori me atlete ai që urdhëroi shembjen e tij në mes të natës, me artistët brenda? Vota për Ilir Metaj është një votë e pastër kundër diktaturës,” thekson ai.
