Presidenti i sapozgjedhur i SHBA-së, Donald Trump tha këtë mëngjes se do të takohet me presidentin rus Vladimir Putin “shumë shpejt” pasi të marrë detyrën javën e ardhshme.
Ai nuk dha një afat kohor për takimin, i cili do të ishte i pari midis liderëve të dy vendeve që nga fillimi i luftës së Rusisë me Ukrainën në shkurt 2022.
I pyetur për strategjinë e tij për t’i dhënë fund luftës, Trump tha për Newsmax:
“Epo, ka vetëm një strategji dhe kjo varet nga Putini. Nuk mund ta imagjinoj se ai është shumë i emocionuar me mënyrën se si shkoi gjithçka, sepse as atij nuk i shkoi aq mirë.”
“Unë e di që ai dëshiron të takohet dhe unë do të takohem me të shumë shpejt. Do ta kisha bërë më shpejt, por… duhet të futem në zyrë fillimisht. Duhet të jesh atje për disa gjëra.”
Kongresmeni amerikan Mike Waltz, këshilltari i ardhshëm i sigurisë kombëtare, tha të dielën se ai pret një bisedë midis Trump dhe Putin në “ditët dhe javët e ardhshme”.
Pushtimi rus i Ukrainës la dhjetëra mijëra të vdekur, zhvendosi miliona dhe shkaktoi krizën më të madhe në marrëdhëniet midis Moskës dhe Perëndimit që nga kriza e raketave Kubane në 1962.
