Një aktivist i të drejtave të njeriut në republikën ruse të Bashkortostanit është dënuar me katër vjet në një koloni burgu pasi një gjykatë e shpalli fajtor për nxitje të urrejtjes etnike. Për shkak të kësaj, ka shpërthyer përleshje mes mbështetësve të tij dhe policisë, raporton Reuters.
Mediat e pavarura të lajmeve në gjuhën ruse raportuan se policia hodhi gaz lotsjellës dhe bëri arrestime pasi shpërtheu një përleshje me një turmë të madhe njerëzish që ishin mbledhur në mbështetje të aktivistit Fail Alsinov. Ende nuk dihet se sa persona janë arrestuar.
Alsinov akuzohet se ka fyer punëtorët emigrantë në një fjalim që mbajti prillin e kaluar në një protestë kundër planeve të minierave të arit në Bashkortostan, që ndodhet në Uralet jugore të Rusisë, pranë kufirit midis Evropës dhe Azisë.
Mbështetësit e tij pretendojnë se çështja kundër tij është hakmarrje e vonuar për rolin e tij në protestat e disa viteve më parë, në të cilat aktivistët bllokuan me sukses planet për të gërmuar kodrën, të cilën vendasit e konsiderojnë një vend të shenjtë.
“Shumë faleminderit për të gjithë ata që erdhën për të më mbështetur. Nuk do ta harroj kurrë këtë. Unë nuk e pranoj fajin tim. Gjithmonë kam luftuar për drejtësi, për popullin tim, për republikën time”, i tha Alsinov gazetarit të medias online RusNews pas vendimit.
