Gjuajtjet me armë zjarri janë bërë të shpeshta në vendin tonë, duke cenuar kështu sigurinë e qytetarëve të cilët ka rast kur mund t’u rrezikohet jeta si pasojë e plumbave qorr, raporton Gazeta Sinjali.
Një rast i tillë ka ndodhur mbrëmë në fshatin Makresh të Artanës, ku një burrë dyshohet se ka shtënë me armë zjarri të llojit kallashnikov.
Sinjali mëson se nga frika e të shtënave e ka pësuar një person i moshuar, i cili me të dëgjuar krismat është rrëzuar nga shkallët e shtëpisë dhe ka marrë lëndime trupore. 69-vjeçari ka kërkuar ndihmë mjekësore në spital, ndërkohë që lidhur me rastin është njoftuar edhe Policia.
Policia në koordinim me Prokurorinë ka kryer bastisje në shtëpinë e të dyshuarit, ku ka gjetur dhe sekuestruar një armë automatike e AK-47 me fishekë dhe një karikator.
43-vjeçari është arrestuar dhe është shoqëruar në stacion policor ku është intervistuar lidhur me rastin.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor dhe i njëjti do të hetohet nën dyshimet për kryerjen e veprës penale ‘Mbajtje në pronësi, kontroll ose posedim të paautorizuar të armës’ dhe ‘Shkaktim i rrezikut të përgjithshëm’.
