Gazetarja kosovare Garentina Kraja e cila aktualisht jeton në Jerusalem bashkë me familjen e ngushtë, të mërkurën në mbrëmje ka kuptuar se nuk është në listën e votueseve nga diaspora, për zgjedhjet e parakohshme parlamentare në Kosovë, përkundër se kishte aplikuar.
Përmes një reagimi në llogarinë e sajë në Facebook, Kraja është shprehur e revoltuar për faktin se po i pamundësohet ushtrimi i të drejtës së saj.
“Prej 6 qytetarëve të Kosovës me të drejtë vote që jemi në Jerusalem, që kemi aplikuar për t’u regjistruar si votues jashtë vendit për zgjedhjet e 14 shkurtit, vetëm 3 janë në listë. Pse KQZ, pse?”, shkruan ajo.
E kontaktuar nga Albanian Post, Kraja është deklaruar se ajo ka ndjekur të gjitha procedurat e aplikimit të kërkuara nga KQZ, “pikë për pikë”.
“Aplikimi nuk ka qenë i komplikuar aspak, e kemi plotësuar një aplikacion dhe e kemi dërguar kopjen e pasaportës. Nuk jemi në listë të votuesve edhe pse kemi aplikuar brenda afatit të përcaktuar nga KQZ.”
“Fatkeqësisht afati për ankesa është mbyllur, sepse ka qenë tepër një dritare e ngushtë për ankesa dhe nuk kemi mbërritur të dërgojmë ankesën në formën që është kërkuar. Pra, do të mbes pa votuar në këto zgjedhje.”
Ndër të tjera ajo ka shtuar se KQZ nuk i ka telefonuar fare.
“Jo, as mua as bashkëshortin tim nuk na kanë kontaktuar në telefon”.
Në anën tjetër, zëdhënësi i KQZ-së Valmir Elezi ka thënë për Albanian Post se KQZ ka certifikuar të gjitha aplikimet e plotësuara sipas kritereve të caktuara.
Nga 130 mijë e 168 aplikacione për regjistrim, janë certifikuar 102 mijë e 100 aplikues.
28 mijë e 68 aplikacionet e refuzuara janë raste të cilët nuk i kanë plotësuar kriteret e aplikimit.
Prej tyre 15 mijë e 933 aplikues janë refuzuar sepse kanë dërguar vetëm formularin e aplikimit për regjistrim, ndërsa 11 mijë e 164 aplikues nuk i kanë dëshmuar identitetin ose kriterin e zotësisë juridike dhe ose aplikacionet për regjistrim kanë qenë të panënshkruara.
Kryetarja e KQZ-së, Valdete Daka, bëri të ditur se më shumë se 80 mijë persona janë lajmëruar në telefon.
Afati i aplikimit për të votuar nga diaspora ka qenë nga 13 deri më 21 janar. Pas periudhës së verifikimit nga KQZ, afati i ankesave në PZAP prej 24 orëve, pas përfundimit të certifikimit të aplikuesëve, ka përfunduar në mesnatën e 3 shkurtit.
Të kontaktuar nga Albanian Post, përfaqësues nga Paneli Zgjedhor për Ankesa dhe Parashtresa (PZAP) kanë njoftuar se janë në proces të numërimit të ankesave të pranuara për 24 orët e fundit.
