Rëndimi i gjendjes socio-ekonomike pas përhapjes së pandemisë së koronavirusit, e goditi edhe kategorinë që janë në nevojë për donacione e ndihmë.
Për Resmije Krasniqin, themeluesen e Qendrës “Hadër” të Prizrenit, muajt e pranverës janë më të vështirë se kurrë, pasi që ka mbetur pa asnjë ndihmë dhe donacion, shkruan lajmi.net.
Resmije Krasniqi këtë qendër e mbanë me financa të veta, me ndihma të vogla të personave të vullnetit të mirë, e nganjëherë me ndonjë shumë simbolike që ia ndanë edhe shteti.
Aty janë të strehuar disa persona me probleme të shëndetit mental, të cilët nga humanizmi i Resmijes, u hoqën nga rruga e iu gjet një kulm mbi kokë.
Muajt e përhapjes së pandemisë, Resmije Krasniqi dhe Qendra “Hadër”, mbetën pa gjëra elementare për jetesë, pa fondacione e pa përkrahje.
Duke rrëfyer për lajmi.net në këtë kohë të vështirë, Krasniqi thotë se ia ka frikën se tre punëtoret që janë në qendrën e saj, do të largohen, e mosha asaj do t’ia pamundësojë edhe të gatuaj për banorët e kësaj qendre.
“Jemi shumë keq. Miell kemi deri diku, po me çka ta hamë këtë miell. Një punëtore që kam pas e ka lanë punën sepse s’ka rroga. Si me gatu unë, u mbyta”, thotë ajo.
Resmije Krasniqi edhe para periudhës së pandemisë kishte vështirësi në sigurimin e mbijetesës për qendrën që e themeloi, e gjendja e se cilës lidhet direkt edhe me personat që janë të strehuar aty.
Në një storie të realizuar nga lajmi.net pak ditë para konfirmimit të rasteve me COVID-19 në Kosovë, Krasniqi e kishte rrëfyer gjithë historikun e qendrës që ajo mbanë. Ndër të tjera, ajo kishte rrëfyer se si edhe ushqimin e merrnin nga pjesët që tepronin nga ushtarët turq aty në afërsi.
Ajo thotë se gjendjen e ka shumë të keqe, dhe i duhet një intervenim apo ndihmë urgjente.
Për të gjithë njerëzit që duan ta kontaktojnë, mund ta bëjnë atë në numrin: 044 278 538(Numri publikohet me kërkesën e Resmijes).
