Prokuroria Themelore në Prishtinë ka bërë të ditur se sot në rastin “Subvencioni 2021” janë arrestuar 21 persona, 14 prej tyre zyrtarë, që dyshohen për marrje ryshfeti, dhënie ryshfeti, keqpërdorim të detyrës zyrtare, ushtrim ndikimi, legalizim i përmbajtje së rreme, mashtrim me subvencione, etj.
Prokurori i çështjes, Rafet Halimi, tha se operacioni është zhvilluar në disa komuna të Kosovës, si në Prishtinë, Pejë, Gjilan dhe Istog, gjersa shtoi se vlera e dëmit i kalon mbi 1 milion euro.
E lidhur me këtë rast, ka reaguar edhe Ministri i Bujqësisë, Pylltarisë dhe Zhvillimit Rural, Faton Peci, i cili e ka përshëndetur veprimin e Policisë dhe Prokurorisë, për aksionin e sotëm.
Ai tha se veprimi i sotëm është përpjekja më serioze për kthimin e dinjitetit e fermerëve, të cilët ndër vite janë bërë pre e skemave mashtruese.
“Fermerët i inkurajoj të bashkëpunojnë me organet e rendit për ta denoncuar çdo veprim, i cili ka cenuar dhe dëmton punën dhe djersën e tyre. Subvencionet duhet të arrijnë te bujqit, por jo te keqpërdoruesit dhe mashtruesit”, shkroi Peci në Facebook.
“Duke ndarë subvencione për fermerë, pa ndërmjetësues e pa keqpërdorues do të mund ta sigurojmë një ambient dhe klimë të favorshme për këtë kategori jetike për shtetin.”
“Kjo që ndodhi sot është përpjekje për vendosje të ligjshmërisë. Nuk do të ndalemi dhe nuk do të kursehemi që këtë Ministri që është bërë e famshme shkaku i skemave kriminale t`ia rikthejmë reputacionin, besimin dhe imazhin që meriton, në mënyrë që ta vejmë ekskluzivisht në dobi të bujqve e fermerëve”, shtoi Peci.
