Shoqata bamirëse “Jetimat e Ballkanit” ka shënuar 12-vjetorin e themelimit. Me këtë rast ka organizuar një event ku ishin pjesëmarrës kryetarë komunash, përfaqësues të partive politike, përfaqësues të bashkësive fetare, artistë dhe shumë dashamirë.
Në këtë përvjetor u dhuruan 148 shtëpi dhe një banesë për familjet skamnore në Kosovë, Shqipëri, Maqedoni Veriore dhe Luginë të Preshevës.
Drejtori Halil Kastrati tha se gjatë këtyre 12 vjetëve shoqata që ai drejton ka arritur të depërtojë në çdo cep të trojeve shqiptare, duke përkrahur familjet skamnore.
Kastrati tha se në këtë datë, 12 vjet më parë nisën rrugëtimin e vështirë me plotë sfida, probleme, por që asnjëherë nuk u dorëzuan.
“Shoqata Jetimat e Ballkanit për më shumë se një dekadë arriti shumë objektiva, e që janë: ndihma ndaj jetimëve, skamnorëve, hallegjinjve. Ndërtimi i më shumë se 1 mijë shtëpive në çdo cep ku jetojnë shqiptarët për familjet në nevojë, blerja e shumë banesa, ushqyem mijëra familje përmes kuzhinave tona. Dhe ia ku jemi. Prezenca juaj sot në këtë përvjetor është argumenti më i mirë se ne së bashku me bamirës shqiptarë anë e kënd trojeve shqiptare lam shumë gjurmë, u rritëm shumë për të qenë në shërbim të njerëzve që për një apo shumë arsye kanë mbetur në mëshirë të fatit”, tha Kastrati.
Për këto 12 vjet Kastrati tha se dëshmuan se me punë, ndershmëri, sinqeritet dhe vendosmëri mund të arrihen edhe syninet që dikur ishin vetëm një ëndërr.
Në këtë event pranuan çelsat e shtëpive kryetarët e komunave përkatëse nga të gjitha trojet shqiptare, të cilët vlerësuan lart punën e “Jetimave të Ballkanit”.
Në fund Kastrati falënderoi të gjithë donatorët për përkrahjen e vazhdueshme ndaj shoqatës që ai drejton.
