Shkruan Alben Eshrefi:
Brenda këtij muaji shënohen 113 vjet nga një prej ngjarjeve më të dhimbshme në historinë e Ferizajt – masakra e tetorit të vitit 1912, kur ushtria serbe dhe çetat çetnike kryen ekzekutime masive ndaj shqiptarëve të pafajshëm, shkruan Alben Eshrefi.
Në mesin e të vrarëve ishin edhe tre axhallarët e babait të Alben Eshrefit – Malë, Saqip dhe Nazif Eshrefi, të cilët, bashkë me shumë qytetarë të tjerë të Ferizajt, u ekzekutuan mizorisht në vendin ku sot ndodhet oborri i Shkollës fillore “Tefik Çanga”.
Trupat e tyre u varrosën po aty, në dheun që u bë dëshmitar i një krimi që ende kërkon drejtësi historike.
Nga katër djemtë e familjes Eshrefi, i vetmi që mbijetoi ishte Ibush Eshrefi, gjyshi i Albenit, i cili ruajti gjallë kujtimin e kësaj tragjedie familjare.
“Vlerësoj se institucionet tona shtetërore e shkencore, para së gjithash Instituti i Historisë, duhet ta ndriçojnë këtë masakër që është kryer në qytetin e Ferizajt 113 vjet më parë. Krahas punimeve studimore, e domosdoshme është edhe ngritja e një obelisku përkujtimor për martirët e vrarë dhe të masakruar nga ushtria dhe njësitet shtetërore serbe”, – thekson Eshrefi.
Një obelisk i tillë, sipas tij, do t’i shërbente kujtesës kolektive kombëtare dhe brezave të ardhshëm, për të mos harruar krimet që arritën përmasa gjenocidale, por edhe për të nderuar sakrificën shekullore të popullit shqiptar për liri dhe bashkim kombëtar.
Sipas të dhënave të kohës, në Masakrën e Ferizajt u vranë e u masakruan mijëra shqiptarë, duke përfshirë burra, gra, pleq dhe fëmijë. Fushat ishin mbuluar me trupat e viktimave, një pamje që mbeti plagë e hapur në kujtesën historike të këtij qyteti.
Familja Eshrefi thekson se do t’i kujtojë përjetësisht me pietet, nderim dhe respekt të veçantë martirët e saj dhe të gjithë shqiptarët që ranë në këtë masakër.
???????? Lavdi jetës, veprës dhe sakrificës së Malë, Saqip dhe Nazif Eshrefit, si dhe të gjithë martirëve të Masakrës së Ferizajt!
