Policia e Vlorës ka shoqëruar 10 persona në komisariat për t’u marrë në pyetje lidhur me ngjarjen e rëndë të një dite më parë, ku u gjet i ekzekutuar 25-vjeçari Xhuljano Bullarit, pak metra larg fshatit Babicë.
Nga hetimet e policisë dhe prokurorisë dyshohet se i riu është vrarë nga pasagjeri në makinë. Mësohet se ai është qëlluar me të paktën dy plumba në kokë. Ngjarja e rëndë ka ndodhur mbrëmjen e së premtes, por trupi i pajetë i 25-vjeçarit është gjetur mëngjesin e së shtunës nga kalimtarë të rastit vetëm pak kilometra larg fshatit Babicë.
Trupi u gjet brenda makinës tip “Fiat Punto” dhe nga hetimet e deritanishme mendohet se 25-vjeçari ka mbërritur atje i shoqëruar nga persona të njohur. Po ashtu, ekspertiza mjeko-ligjore dyshon se 25-vjeçari ka ndërruar jetë rreth orës 21:00 të mbrëmjes.Shkaqet e vrasjes mbeten ende mister, ndërsa i riu kishte pak kohe që kishte dalë nga burgu, ku kishte vuajtur një dënim për transport të paligjshëm të disa sirianëve. Grupin e hetimit pritet ta ndihmojë dëshmia e të afërmve të 25 vjeçarit.
Babai i tij ka thënë se i biri ishte larguar nga shtëpia në Babrru të Tiranës rreth orës 18:00-19:00 të pasdites se te premtes, si zakonisht për të pirë kafe dhe ai nuk ka informacion se si ka mbërritur në Vlorë, ku edhe më pas u gjet i ekzekutuar me të paktën 2 plumba. Mjeti ishte në emër të një gruaje nga Tirana ku i riu me origjinë nga Elbasani jetonte prej vitesh.
Pista e parë e hetimit është një vrasje për pazare të prishura të drogës, ndërsa po shikohet e kaluara e viktimës si dhe thirrjet telefonike që mund të ketë bërë dhe marrë para ekzekutimit. Ndërkohë nga kërkimet e policisë viktima Xhuliano Bullari, ka qenë i ndjekur penalisht me trafikim të qenieve njerëzore.
