Kryetari i Lidhjes Demokratike të Kosovës, Lumir Abdixhiku e ka quajtur të frytshëm dhe pozitiv takimin me kandidaten për president, Vjosa Osmani. Megjithatë, paralajmëroi edhe një takim tjetër për t’i qartësuar edhe më tej disa çështje. Ndërkohë tha se do të konsultohen edhe me organet e brendshme partiake dhe se LDK-ja do të jetë unike rreth temës së presidentit.
Abixhiku pasi zhvillojë takimin gati dy orësh me Osmanin në Kuvendin e Kosovës, tha se ka një frymë dhe intencë pozitive për ta zhbllokuar situatën e tanishme politike. Derisa theksoi se nuk kanë vërejtje rreth platformës së Osmanit për presidente.
“Në këtë takim kemi diskutuar çështjet me interes rreth formimit të institucionit të presidentit. Takimi ka qenë i frytshëm, ka qenë takim pozitiv dhe është zhvilluar në atmosferë të mirë ndërmjet njerëzve që kanë bashkëpunuar një kohë të gjatë. Kemi diskutuar platformën që pretenduesja për presidente dëshiron ta ndërtojë në rolin e saj që synon. Në këtë platformë kemi dhënë edhe mendimet dhe diskutimet tona. Nuk kemi vërejtje lidhur me përmbajtjen e platformës. Po ashtu, kemi diskutuar pozicionin e saj karshi akterëve partiakë në të ardhmen, kemi avancuar në këto diskutime dhe do të kemi edhe një takim të ardhshëm shumë shpejtë. Ndërkohë do t’i kthehemi organeve të partisë për t’i informuar në detaje rreth përmbajtjes së këtij takimi. Besoj që pas konsultimeve të brendshme dhe pas konsultimeve me zonjën Osmani do të kemi edhe qëndrimin tonë përfundimtar. Ajo që kemi parë sot është se ka qenë një frymë dhe intencë pozitive për të bërë zhbllokimin e situatës së tanishme”, tha Abdixhiku.
Lidhur me mundësinë e thirrjes së seancës për zgjedhjen e presidentit, Abdixhiku tha se e njëjta mund të thirret në momentin që ka pajtueshmëri prej të gjithë akterëve politikë, e jo njërës palë. Sipas tij, çdo hapë tjetër nëse s’ka konsensus do të jetë i pamatur në këtë fazë.
“Seanca mund të thirren në momentin e parë që ka pajtueshmëri prej akterëve politikë dhe jo vetëm njërës palë. Ne jemi në proces të ndërtimit të kësaj pajtueshmërie, nëse e arrijmë atëherë do të përcaktojmë edhe datën e seancës. Çdo hap tjetër do të jetë i pamatur në këtë fazë. Prandaj edhe atë duke i respektuar afatet kushtetuese do t’i përcaktojmë edhe hapat e ardhshëm”, tha ai.
Rreth unitetit brenda LDK-së, Abdixhiku para gazetarëve tha s’ka qëndrime individuale në LDK dhe se gjithë vendimet e organeve të partisë do të jenë për të gjithë.
“S’mundet të ketë qëndrime individuale, LDK-ja është parti që vendimet i merr në organet e saja më të larta. Këto vendime komunikohen grupit parlamentar, gjithmonë në konsultim me ta synojmë të jemi unik në mënyrë që vendimet e shumicës në LDK të jenë vendime për të gjithë”, tha ai.
Lidhur me mundësinë e aderimit të deputetëve të Listës Guxo në LDK, Abdixhiku tha se ata janë deputetë të koalicionit qeverisës, por në të ardhmen bashkëpunimi mbetet i hapur me gjithë ata që e ndjejnë vetën në partinë e tij.
“Deputetët e Listës Guxo janë pjesë e koalicionit qeverisës. Deputetët e LDK-së janë pjesë e opozitës në këtë vijë janë të qartësuar gjërat. Në të ardhmen bashkëpunimi mbetet i hapur me gjithë ata që e ndjen veten dhe përshtaten me LDK-në”, tha ai.
Ky është takimi i parë ndërmjet Vjosa Osmanit dhe kryetarit të LDK-së, Lumir Abdixhiku, pa praninë e kryetarit të Vetëvendosjes, njëherësh kryeministrit Albin Kurti.
